Tentamenvaktskjerfet er ferdig

Ein ufo har landa. Eg starta på eit enkelt skjerf i eit effektgarn eg fekk frå ein hemmeleg ven på hobbyforum (AnnetteK, trur eg) då eg satt tentamenvakt før jul. Eit nøste var alt eg hadde, men sjå kor langt det vart! Litt forskjell på før og etter blokking. Så nå er det eit punkt mindre på ufolista mi oppe i hjørnet.

Aprilsokkane

På sokkealongen kunne me velga fritt frå sokkane på Garnstudio, og då valde eg disse. Dei passa bra til eit sjølvstripande garn som eg ville bruka opp. Ganske fornøgd med resultatet, håpar syster mi blir like fornøgd. Ho hinta litt om at ho hadde ikkje så mykje tjukke sokkar og kan ikkje strikka så mykje anna enn lappetepper.

Korleis få det ryddig med mange strikketøy som "må" liggja framme

Det er eit problem når eg har fleire prosjekt på ein gong og eg synest eg må ha alle liggjande framme i tilfelle eg finn på at eg skal gjera noko med dei. Det vert så rotete. Men eg har ei løysing som hjelper litt i alle fall. Eg har nokre fine korger og boksar som står til pynt. Og oppi der har eg plass til mykje rart. Denne korga er frå Danmark og skikkeleg søt, sjølv om den eigentleg er litt lita og upraktisk.

Kylavantene ferdige

Eg hadde litt problem med byrjinga på desse vantene, ein kombinasjon av dårleg forklaring og at eg var sjuk den kvelden. Men etter boblene var dei superenkle og kjekke å strikka. Garnet har eg fått av ein hemmeleg ven på hobbyforum. Det heiter Austermann Royal og er ein blanding av merino, silke, kashmir og polyamid. Mjukt og nydeleg. Herleg å strikka med, kan godt vera at eg kjøper meir av det garnet.

Uglesokkar

Då var dei ferdige, før april. Og det er godt gjort for eg har nesten ikkje vore heime heile mars. Eg burde nok valt eit anna garn, men slik er det når ein helst skal bruka garn frå lageret. (I tillegg syntest eg ikkje at eg kunne bruka penger på garn i ein månad med store røde tal i budsjettet...)

Dette mønsteret var kjekt å strikka. Fyrste gong eg strikkar frå tåa og opp, men det blir nok ikkje siste. Men eg vil finna ein betre måte å felle av på, syntest det vart litt stramt i kanten oppe. Det er og fyrste gong eg strikkar ein annan hæl enn den eg har lært av mor. Men det blir nok heller ikkje siste gong.

Uglepulsvantar i silke

Mine pulsvantar er strikka i 100 % pure silk frå Debbie Bliss, kjøpt i Danmark i fjor sommar. Dei er pynta med perler frå perlehuset i Stavanger. Perlene er strikka på, synest det blir finast slik. Kjekt og greitt mønster å strikka.

Handarbeid på leirskule

Eg er avhengig av handarbeid, må alltid ha noko å putla med i hendene. Så sjølv om eg skulle vere på leirskule med ein klasse, ski og moro heile dagen, ansvar for middag og lita tid til å sitja ned, så måtte eg ha eit handarbeid med. Det måtte vera så enkelt som mogleg, og englemaskesjal vart løysinga. Eg klarte ikkje å bli ferdig sjølv om me var der ei heil skuleveke. Til vanleg brukar eg 1-2 kveldar på eit slikt sjal.