Gartnartøfler

Nokre gonger får eg ein idé, og då må det berre prøvast ut. Sånn var det med desse tøflene som syster mi fekk då ho fylde år.
Teknikken er våttoving som skildra i denne boka. Ulla er kjøpt hos Ullform i Hillevåg.

Brusteinen er grå nålefilt som er klippa opp i mange små ruter og lagt på i slutten av våttovinga. Blomane har eg nålefilta på etterpå.

Nye tøfler til 50 kr!

Hendene mine er blå. Og føtene. Men kva gjer vel det når eg har fått verdas herlegaste tøfler!

Eg kjøpte to tops med turkis ull på Gjestal Spinneri. Til saman kosta dei 50 kr. Heile kvelden i går gjekk med til å leggja ull på ein mal, tova litt med bobleplast, leggja eit nytt lag, rulla i sivmatte og tova med tøflene på foten. I dag har eg nålefilta blomar i noko merinoull som låg i skapet.

Det einaste minuset var at ulla farga av. Alt vart blått. Og eg har lært ein ting; sånn farge bør vaskast av med ein gong. Eg har to blå hender og to blå føter. Ikkje tale om å få det av. Neste gong skal eg tova med hanskar. Men gjett om det var verdt strevet! Dei er ikkje tørre ennå, men allereie i bruk.

Prøvelapp i filting

Eg har lært noko nytt! Og så enkelt! Elevane mine vart skikkeleg imponerte då eg viste dei prøvelappen eg hadde strikka i fritidsgarn på pinne 7. Med 20 masker var det gjort på ein halvtime, men det var nok det kvite hjarta som imponerte. Det er berre kvit Canto der eg har fjerna den tynne tråden som bind ulla saman. Dette har eg plassert på den lilla kluten, oppå ein bete med skumgummi, og brukt ei filtenål til å festa det med. Korleis det blir festa? Filtenåla har taggar som dreg fiber gjennom til andre sida, så det er berre å stikke gjennom både ulla og lappen mange gonger med filtenåla. Supersmart! Denne teknikken kjem eg nok til å bruka mange gonger, både på skulen og heime, sjølv om denne lappen nok havnar i ein perm til bruk som mal ein gong eg treng det.