Gartnartøfler

Nokre gonger får eg ein idé, og då må det berre prøvast ut. Sånn var det med desse tøflene som syster mi fekk då ho fylde år.
Teknikken er våttoving som skildra i denne boka. Ulla er kjøpt hos Ullform i Hillevåg.

Brusteinen er grå nålefilt som er klippa opp i mange små ruter og lagt på i slutten av våttovinga. Blomane har eg nålefilta på etterpå.

Kanskje eg vil ha dei sjølv likevel...

Eg har nok sokkar, så eg har eigentleg sagt at eg ikkje skal ha desse sjølv. Dei skal i gåveskuffa. Men, dei vart jo ganske fine og passar perfekt på foten min.

Garnet er Perfect frå Sandnesgarn. Aldeles nydeleg å strikka med og eg synest der er ein fin glans i det. Pinne 3,5 mm.

Mønsteret er Traveler. Desembersokkane. Og då har eg klart alle sokkepara i 2009!

Og, ja, eg gøymde mønsteret etter at eg hadde lært flettinga utanåt. Så hælfelling og ribb bak og oppe veit eg ikkje om stemmer med mønsteret. Og tåa var altfor "klatt" til at eg gadd å prøva då eg la opp på julafta.

Novemberpulsvantane

Ja, litt treig. Men måtte verta ferdig med julegåvene først.

Mønsteret er Mirror Twist Mitts og garnet er Cascade Alpaca Lace frå Strikk Innom. Ikkje heilt fornøgd med kombinasjonen, men det var heldigvis svigerinna mi som skal byrja i jobb som postbud etter nyttår.

Kalender til far

For eit par år sidan gav eg far min ein kalender med bibelvers, sangvers, sitat og dikt til jul. For eit par månader sidan fekk eg den att. Om eg kunne skifta ut kalenderdelen og gje den om att?

Eg har forandra litt meir enn berre kalenderdelen. Men ei fin gåve er det i alle fall. Ein idé til andre kanskje?

Tre par leggvarmarar

Det har vore litt panikkstrikking i desember etter at eg plutseleg fekk veta at bror min og kona skulle koma heim til jul med tre tantungar.

Løysinga vart tre par leggvarmarar i Alfa frå Sandnesgarn.
Dei blå er i mønsteret Tree trunk legwarmers.

Dei kvite er eige design med litt hjelp av Barbara. (Ravelry-link)

Dei lilla er òg eige design, med litt hjelp av Garnstudio til borda nedst.

Novembersokkane, eige design :-)

Eg har lenge ønska å strikka desse sokkane att. Mønsteret er laga for nokre år sidan til søstera mi. Ho hadde teikna ein liten teikning som eg overførde til eit ruteark og gjorde til eit sokkemønster.

Sokkane er strikka i Sisu frå Sandnes garn på pinne 2,5 mm.

Hæl og tå har eg lånt frå Circles and squares, eit mønster frå Mariannes netthus. Men eg har berre hatt 64 masker, ikkje 72, dermed måtte òg masketalet i tå og hæl tilpassast.

Nye tøfler til 50 kr!

Hendene mine er blå. Og føtene. Men kva gjer vel det når eg har fått verdas herlegaste tøfler!

Eg kjøpte to tops med turkis ull på Gjestal Spinneri. Til saman kosta dei 50 kr. Heile kvelden i går gjekk med til å leggja ull på ein mal, tova litt med bobleplast, leggja eit nytt lag, rulla i sivmatte og tova med tøflene på foten. I dag har eg nålefilta blomar i noko merinoull som låg i skapet.

Det einaste minuset var at ulla farga av. Alt vart blått. Og eg har lært ein ting; sånn farge bør vaskast av med ein gong. Eg har to blå hender og to blå føter. Ikkje tale om å få det av. Neste gong skal eg tova med hanskar. Men gjett om det var verdt strevet! Dei er ikkje tørre ennå, men allereie i bruk.

Min første klut

Eit søk på Ravelry etter mønster på kjøkkenklut resulterte i min første eigenstrikka kjøkkenklut.

Mønsteret heiter Three crosses og eg måtte berre strikka det. Enkelt og kjekt mønster som eg har forandra litt på, slik at mønsteret kjem godt fram på begge sider. Garnet er Mandarin Naturell. Pinne nr. 3,5.

Militærgrøne babysokkar

Eg gler meg til eg ein gong får ein liten som kan få desse sokkane! Militærgrønt er ikkje ein farge som eg forbinder med babyar, men eg synest det vart litt tøft her. Fargane er mykje skarpare eigentleg.

Mønsteret, hat-heel, likte eg derimot ikkje. Klatt og mykje trådar å festa. Kjekt å prøva og fine sokkar, men mor meinte eg kjefta vel mykje på dette strikketøyet...

Strikka i Sisu på pinne 3.

September- og oktobervantane ferdige!

Nå kjem syster mi til å verta glad! Ho arbeider ute og frys på hendene, så ille at ho har begynt å få kuldeeksem. Men nå har me funne ut at pulsvantar under arbeidshanskane hjelper på. Så alle pulsvantar framover kjem til å hamna på hennar hender.

Mens eg strikkar høyrer eg på Matteuspasjonen av Bach. Herleg og mektig musikk!

Septembervantane, Fishtail, strikka i Sandnes Alpakka på pinne 3,5.

Oktobervantane, Improvisation, strikka i Sterk frå Du store alpakka på pinne 3,5.

150 stjerner!

Større og større, vanskelegare og vanskelegare å ta bilete. Men framleis er det kjekt å hekla kvar einaste stjerne. Og framleis minnar teppet meg på ei strofe i ein kristen sang; "Og mens du stjernene teller, vokser din tro, ditt håp."

Septembersokkane

Første og siste gong eg har på meg desse! Ikkje fordi eg er misfornøgd, men fordi dei er rosa.

Eg er kjempefornøgd med dette mønsteret. Kan godt vera at eg strikkar fleire Havskumsokkar. Mønsteret vart fint, det var lett å forstå og det var ein god hælfelling. Garnet er Viking Sportsragg. Pinne nr. 3.

120 stjerner!

Nå nærmar eg meg halvvegs... Og framleis er det kjekt å hekla stjerner, lurer på kva tid eg vert lei?

Eg har sydd barnekjole, men kva skal eg med den?

Ja, kva skal eg gjera med denne kjolen? Eg har ikkje bruk for den. Men gøy å sy, det var det!

Det byrja med at 10.-klassingane mine skulle sy. To jenter valde å sy kjole etter mønster frå boka "Barn igjen". Dei hadde klippa ut alle delane, og spurde så om kva dei skulle gjera. Eg las mønsteret, først ein gong og så ein gong til. "Hæ?" Heldigvis var timen nesten slutt, og eg sette meg ned med boka og las og teikna. Nei, dette var eit mønster som måtte prøvast. Så det var det eg gjorde i går kveld når internettet mitt var nede etter torevêret. Den vart ganske fin, men kva skal eg med den?

Sjal i Melody

Mønsteret var veldig kjekt å strikka, men ein må halda tunga beint i munnen... Lite vrange masker, men til gjengjeld mykje kast og fellingar og ikkje alltid så lett å sjå korleis mønsteret skulle verta.

Garnet er 100 % ull, superwash og heiter "Melody." Dette var eit herleg garn å strikka med. Og eg synest fargespelet er nydeleg.

Mønster: Sagittaria

Garn: Melody frå Jojoland, kjøpt hjå Strikk Innom

Skjerf i gimping

Eit nydeleg skjerf, får ein lov til å seie det om sitt eige arbeid? Fornøgd er eg i alle fall. Garnet var heilt nydeleg å hekla/gimpa med. Melody frå Jojoland, kjøpt gjennom sjalgarnklubben til Strikk Innom. Det er brukt mindre enn 50 g.

Skjerfet er gimpa.
Eg har laga to remser med 360 løkker, dvs 180 på kvar side med heklenål 3,5 mm på ein 60mm gimpegaffel. Det var kanskje litt i meste laget, for skjerfet vart over 2 meter langt. For å setja remsene saman tok eg heklenåla gjennom ei løkke på den eine remsa, tok ei løkke på andre remsa og drog gjennom. Slik fortsette eg med å ta ei løkke og dra gjennom ei løkke på andre remsa til eg kom til endes. Der tok eg endetråden til den eine remsa og drog gjennom siste løkka for å festa. Deretter hekla eg ein omgang med 1 fm i kvar løkke med ei lm mellom. Deretter har eg hatt tre omganger med 3 lm og 1 fm i kvar bue. I hjørnene er det ein ekstra lmb à 3 lm. (3 lm, 1 fm i same bue) Viktig å blokka til slutt, skjerfet mitt ville berre krølla seg mens eg jobba med det.

Det enkle er ofte det beste

Eit skjerf i gimping. Eige design, men veldig enkelt mønster. Skal ta betre bilete i morgon. Og kanskje eg skriv ned mønsteret òg.

100 stjerner!

Eit prøveprosjekt

Eg har prøvd meg på stitchery og lappeteknikk med trekantar. Nybegynnar med kjempeprosjekt. For viss eg får det til så skal dette verta eit stort sengeteppe. Og det vart nå greitt nok, så me får sjå kva det blir til.

Augustsokkane ferdige

Eg klarar ikkje å bestemma meg for om eg likte desse sokkane, så eg tenkte å setja opp ei liste med positivt og negativt. Mønsteret heiter Outside in.

Positivt:

-Lite vrange masker. Sjølv ikkje på hælen, som skal strikkast rundt, ikkje fram og tilbake.

-Hælen vart fin, og var eigentleg enkel å strikka. (Når eg berre var ferdig med å kjefta og fann ut korleis det skulle gjerast.)

-Sokkane kan brukast både på retta og vranga. Men eg synest retta vart finast med sjølvstripande garn.

Negativt:

-Ikkje greitt å strikka to sokkar på ein gong når ein plutseleg skal ta opp masker lenger oppe og strikka rundt med ein tredje tråd. Det vart litt mykje å halda styr på; Ein lang rundpinne, eit sett med strømpepinner, to sokkar, to nøster og tre trådar.

-Laaaaang forklaring, men det er jo litt greitt òg når det vert fortalt korleis kvar einaste maske skal strikkast.

-Burde nok brukt eit anna garn som ikkje er sjølvstripande, men eg kan ikkje bruka pengar på garn når eg kanskje skal kjøpa hytte i lag med familien.

80 stjerner

Frokostritualet i ferien; to skjever, eit glas melk med Oboy og hekla ei stjerne. Det spørst om eg klarar ein til dagen når skulen byrjar att. Nå har eg akkurat 80 stjerner, men er framleis ikkje ein gong halvvegs.

To nye par pulsvantar

Det raude paret er hekla i garn eg har spunne sjølv. Det er augustmønsteret på Pulsvarmeralongen. Fort gjort, eg fekk mønsteret for eit par timar sidan.

Det blå paret er strikka i Evilla. Eit garn eg ikkje anbefaler, for eg synest det er hardt og lite behageleg å ta i.

Men mønsteret er eg fornøgd med. Eige design med litt hjelp frå Barbara igjen.