150 stjerner!

Større og større, vanskelegare og vanskelegare å ta bilete. Men framleis er det kjekt å hekla kvar einaste stjerne. Og framleis minnar teppet meg på ei strofe i ein kristen sang; "Og mens du stjernene teller, vokser din tro, ditt håp."

120 stjerner!

Nå nærmar eg meg halvvegs... Og framleis er det kjekt å hekla stjerner, lurer på kva tid eg vert lei?

100 stjerner!

To nye par pulsvantar

Det raude paret er hekla i garn eg har spunne sjølv. Det er augustmønsteret på Pulsvarmeralongen. Fort gjort, eg fekk mønsteret for eit par timar sidan.

Det blå paret er strikka i Evilla. Eit garn eg ikkje anbefaler, for eg synest det er hardt og lite behageleg å ta i.

Men mønsteret er eg fornøgd med. Eige design med litt hjelp frå Barbara igjen.

Hekla jakke

Togturen frå Bryne til Lillehammer, og vidare til Trondheim gjekk så fort som berre det. Med heklenåla i full fart vart eg nesten ferdig på turen. Då eg kom heim mangla eg eit erme og kantar. Det tok tid... Kan ikkje fordra å hekla kantar, må alltid gjera det mange gonger før eg vert fornøgd. Knappane er kjøpt i Trondheim. Me var innom ein butikk der dei kun hadde knappar, perler, bånd og liknande. Ein heil vegg med knappar, eg plukka ut desse hjartene. Dei passa perfekt til jakka mi. Mønsteret er frå Interweave Crochet. Og eg er i "Gjera-ferdig-modus", så nå kjem det til å verta mykje å sjå i bloggen min framover.

Stjernehimmelen

Nå har eg 60 stjerner. Og, ja, eg har ikkje klart å halda meg til ein om dagen... Hadde teppet med meg som einaste handarbeid på tur til Austlandet og kom heim med 20 fleire lappar i løpet av ei veke.

Garn til stjernehimmel

Nå trur eg nesten eg har det som er å få av blå- og gulfargar i merinoull til pinne 2,5 frå Dale, Sandnesgarn, Vikinggarn og PT. Det er Lanett, Panda og Babyull. Eg må kanskje ha nokre fleire nøster så eg er på utkikk etter andre produsentar som har merinoull. Men nå vil eg først hekla opp ein del stjerner til, så eg veit kor mykje eg treng.

32 stjerner

Eg har fått dilla på å hekla stjerner. Og det er vanskeleg å berre hekla ei til dagen, det vert fort 5-6 viss eg sett i gang.

Det er to forskjellige slags turkise, hjørnene er i ein lysare nyanse. Og nå vert snart det gule bytta ut med ein annan gul. Eg kjøper berre eit nøste av kvar farge og heklar til det er tomt.

Eg teller stjerner...

men har berre kome til ti foreløpig. Det går sakte, men sikkert framover med En-bestemor-om-dagen-prosjektet mitt. Eg er fornøgd både med fargane og mønsteret. Litt feil fargar på biletet, men eg syntest det vart så fint med lyset frå vindauget. Garnet er restegarn, og eg reknar med eg må byte ut det gule og turkise etter kvart.

Dei tre første

"Og mens du stjernene teller, vokser din tro, ditt håp." Sitat frå ein kjent, kristen sang som eg ofte speler og nynnar på. Syntest det passa til stjernehimmelen eg har tenkt å laga som mitt bidrag til alongen "En bestemor om dagen". Hekla med str. 3 mm og babyull frå Rauma og eit garn eg trur er babyull frå Sandnes. Mønster er henta frå ei bok eg kjøpte på Amazon; "Beyond the square; Crochet Motifs".

Handarbeid på leirskule

Eg er avhengig av handarbeid, må alltid ha noko å putla med i hendene. Så sjølv om eg skulle vere på leirskule med ein klasse, ski og moro heile dagen, ansvar for middag og lita tid til å sitja ned, så måtte eg ha eit handarbeid med. Det måtte vera så enkelt som mogleg, og englemaskesjal vart løysinga. Eg klarte ikkje å bli ferdig sjølv om me var der ei heil skuleveke. Til vanleg brukar eg 1-2 kveldar på eit slikt sjal.