Kanskje eg vil ha dei sjølv likevel...

Eg har nok sokkar, så eg har eigentleg sagt at eg ikkje skal ha desse sjølv. Dei skal i gåveskuffa. Men, dei vart jo ganske fine og passar perfekt på foten min.

Garnet er Perfect frå Sandnesgarn. Aldeles nydeleg å strikka med og eg synest der er ein fin glans i det. Pinne 3,5 mm.

Mønsteret er Traveler. Desembersokkane. Og då har eg klart alle sokkepara i 2009!

Og, ja, eg gøymde mønsteret etter at eg hadde lært flettinga utanåt. Så hælfelling og ribb bak og oppe veit eg ikkje om stemmer med mønsteret. Og tåa var altfor "klatt" til at eg gadd å prøva då eg la opp på julafta.

Novembersokkane, eige design :-)

Eg har lenge ønska å strikka desse sokkane att. Mønsteret er laga for nokre år sidan til søstera mi. Ho hadde teikna ein liten teikning som eg overførde til eit ruteark og gjorde til eit sokkemønster.

Sokkane er strikka i Sisu frå Sandnes garn på pinne 2,5 mm.

Hæl og tå har eg lånt frå Circles and squares, eit mønster frå Mariannes netthus. Men eg har berre hatt 64 masker, ikkje 72, dermed måtte òg masketalet i tå og hæl tilpassast.

Militærgrøne babysokkar

Eg gler meg til eg ein gong får ein liten som kan få desse sokkane! Militærgrønt er ikkje ein farge som eg forbinder med babyar, men eg synest det vart litt tøft her. Fargane er mykje skarpare eigentleg.

Mønsteret, hat-heel, likte eg derimot ikkje. Klatt og mykje trådar å festa. Kjekt å prøva og fine sokkar, men mor meinte eg kjefta vel mykje på dette strikketøyet...

Strikka i Sisu på pinne 3.

Septembersokkane

Første og siste gong eg har på meg desse! Ikkje fordi eg er misfornøgd, men fordi dei er rosa.

Eg er kjempefornøgd med dette mønsteret. Kan godt vera at eg strikkar fleire Havskumsokkar. Mønsteret vart fint, det var lett å forstå og det var ein god hælfelling. Garnet er Viking Sportsragg. Pinne nr. 3.

Augustsokkane ferdige

Eg klarar ikkje å bestemma meg for om eg likte desse sokkane, så eg tenkte å setja opp ei liste med positivt og negativt. Mønsteret heiter Outside in.

Positivt:

-Lite vrange masker. Sjølv ikkje på hælen, som skal strikkast rundt, ikkje fram og tilbake.

-Hælen vart fin, og var eigentleg enkel å strikka. (Når eg berre var ferdig med å kjefta og fann ut korleis det skulle gjerast.)

-Sokkane kan brukast både på retta og vranga. Men eg synest retta vart finast med sjølvstripande garn.

Negativt:

-Ikkje greitt å strikka to sokkar på ein gong når ein plutseleg skal ta opp masker lenger oppe og strikka rundt med ein tredje tråd. Det vart litt mykje å halda styr på; Ein lang rundpinne, eit sett med strømpepinner, to sokkar, to nøster og tre trådar.

-Laaaaang forklaring, men det er jo litt greitt òg når det vert fortalt korleis kvar einaste maske skal strikkast.

-Burde nok brukt eit anna garn som ikkje er sjølvstripande, men eg kan ikkje bruka pengar på garn når eg kanskje skal kjøpa hytte i lag med familien.

Kva er dette?

Nei, det er ikkje hansker. I mangel av babyføter trakk eg den eine julisokken på handa for å visa kor god strekk det er i dei. Foreløpig hamnar dei i ein skuff, der dei anten vert gåver eller blir liggjande til eg får bruk for dei sjølv. Strikka i Austermann Royal, garn eg fekk frå ein hemmeleg ven på Hobbyforum. Og dei er berre heilt nydelege :-)

Endeleg!

For nokre dagar sidan trudde eg ikkje at eg nokon gong ville verta ferdig med Junisokkane. Men eit par dagar med strikking på terrassen og strikkebesøk hjå mor, så vart dei ferdige. Og dei er på god veg til å verta nye yndlingssokkar! Strikka i Opal på pinne 2,5 og med litt modifisering av oppskrifta.

Hubby House ferdig

Eg likar betre og betre å strikka sokkar frå tåa og opp, og Judy-eit-eller-anna sin måte å leggja opp på var berre heilt genial.

Der er ingen mannfolkbein å prøva dei på her i huset, men eg trur dei enda opp med å vera ca. 42-43. Dei er strikka i Sisu på pinne 3. Prøvde å få dei skikkeleg mannfolk med svart og militærfargar.

Aprilsokkane

På sokkealongen kunne me velga fritt frå sokkane på Garnstudio, og då valde eg disse. Dei passa bra til eit sjølvstripande garn som eg ville bruka opp. Ganske fornøgd med resultatet, håpar syster mi blir like fornøgd. Ho hinta litt om at ho hadde ikkje så mykje tjukke sokkar og kan ikkje strikka så mykje anna enn lappetepper.

Uglesokkar

Då var dei ferdige, før april. Og det er godt gjort for eg har nesten ikkje vore heime heile mars. Eg burde nok valt eit anna garn, men slik er det når ein helst skal bruka garn frå lageret. (I tillegg syntest eg ikkje at eg kunne bruka penger på garn i ein månad med store røde tal i budsjettet...)

Dette mønsteret var kjekt å strikka. Fyrste gong eg strikkar frå tåa og opp, men det blir nok ikkje siste. Men eg vil finna ein betre måte å felle av på, syntest det vart litt stramt i kanten oppe. Det er og fyrste gong eg strikkar ein annan hæl enn den eg har lært av mor. Men det blir nok heller ikkje siste gong.

Kerttusokkane ferdig

Skikkeleg fornøgd med mønsteret denne månaden. Desse sokkane var kjekke å strikka. Enkelt, men det ser avansert ut, sånt liker eg! Eg har brukt garnrestar, men ikkje mine restar. Mor fekk minka ned garnlageret med noko over 100 gram sokkegarn frå Sandnes. Dei er strikka på 3,5 og det gjekk fort når eg berre kom i gang. Nå er det mest veving som står på programmet resten av månaden, men eg kjem nok til å strikka litt og.

Januarsokkane ferdig

Desse vart eigentleg ferdige i går, men måtte venta på dagslys for å ta bilete. Dei er allerede tekne i bruk. Eg brukte Frøyagarn frå Viking og pinne 2,5. Sidan eg ikkje kan lika forskjellege sokkar og strikkar begge to på ein gong, er mine like. I og med at eg rekna ut at eg ikkje kom til å strikka ned til den fyrste nullen, behaldt eg desimalane slik dei står. Då fekk eg litt fleire striper. Og nå kan eg dei fyrste 20 desimalane i pi: 3,14159 26535 89793 23846. Etterpå der kjem 2, og så var sokkane mine lange nok.

Januarsokkane på Sokker 2009

Då er eg godt i gang med pi-sokkane. Skikkeleg artig, og eg trur jammen eg kjem til å læra i alle fall dei 20 fyrste desimalane. Foreløpig har eg strikka 3,14159 62535 89.

Sokkar

Desse sokkane vart eg utfordra til å strikka av jogusi på hobbyforum. Eigentleg skulle dei vere slik: http://emileeknits.wordpress.com/about-2/heart-lace-socks/ Men det vart vanskeleg når eg ikkje hadde så tynt garn. Eg prøvde med det tynnaste eg hadde og pinne nr 2. Men det vart passande til ein elefant. Og sjølv om systera mi brukar fem nummer større enn meg i sko, så har ho ikkje elefantføter.

Men oppskrifter er jo berre veiledande, så eg forandra det til 64 masker og fann fram masse restegarn i Sisu og Silja, samt ein lang rundpinne. Tok eit nøste om gongen og ein tråd frå kvar ende av nøstet og strikka til det var tomt.

Og resultatet vart godt motteke; "Så kule! Dei er sikkart gode!"